Ordainduko kideek “hitz egitera esertzeko” eskaera egin diote Mondragon Taldeari

Mondraberri / 2014ko martxoak 20, osteguna 

Ordaindu plataformak mobilizazio berri bat egin du gaur, osteguna.  Fagor Taldeko Borondatezko Diru-ekarpenak eta Kapital Sozialerako Maileguetatik kaltetutako 100 pertsonatik gorako taldea Biteri plazatik abiatu da goizeko 11:00k aldera, eta Mondragon Taldearen egoitzaraino joan da protesta egitea.  Bidean, “devolvernos nuestro dinero” edota “La MCC, la vergüenza de Euskal Herria” bezalako aldarriak entzun dira, besteak beste.  Behin Mondragon Taldeko egoitza parera helduta, Ordainduko kideek “hitz egitera esertzeko” eskaera egin diete Korporazioko agintariei, eta lau goi-karguen aurpegiak zeramatzan kartela ere jarri dute, “MCC erruduna” zioen leloarekin.

Biteri plazatik irten baino lehen, plataformako kide eta bozeramaile Mikel Olabek auzi honen azken berritasunen berri eman du, baita datozen asteetarako aurreikusita dauzkaten mobilizazioena ere.  Ohikoa den moduan, ostegun arratsaldean elkarretaratzea egingo dute Biteri plazan arratsaldeko 18:00etan, eta ondoren Iturriotz kalean Laboral Kutxak duen bulegora joango dira protesta egitera.  Honetaz gain, apirilaren 5ean finantza-entitateak Donostian burutuko duen Ohiko Batzar Orokorrera joateko asmoa ere plazaratu dute.


Erakunde publikoekin batzartzea ere aurreikusita dauka Ordainduk.  Datorren astean Eusko Jaurlaritzara joango direla iragarri dute, eta bertan EH Bilduko ordezkari politikoekin batzartuko dira.  Gipuzkoako Foru Aldundira ere joko dutela esan dute eta bertan, konponbide bat bilatze aldera MCCarekiko bitartekaritza lana egitea proposatzeaz gain, Borondatezko Diru-ekarpenak eta Kapital Sozialerako Maileguengatik kaltetutakoei Diru-sarrerak Bermatzeko Errenta –RGI delakoa- kobratzeko aukera ematea ere eskatuko dute. 

Era berean, patrimonioaren hazkundearen ondorioz Ordainduko kideei Gipuzkoako Ogasunak kendutako dirua -500 eta 1.000 euro artekoa- itzultzea ere exijituko diote Diputazioari.  Olabek azaldu duenez, “diru hori gure kontu korronteetan zegoela suposatuz egin behar izan genion ekarpen hori Ogasunari baina, egungo egoera aintzat hartuta eta kapital hori Mondragon Taldeak itzultzen ez digula ikusita, behintzat bere garaian kendutako dirua bueltatzea eskatuko diogu Aldundiari”.